وزارت امور خارجه‌ی اوزبیکستان ام‌روز، سه‌شنبه اعلام کرده است که نشستی با حضور نمایندگان سازمان ملل و جمهوری‌های آسیای مرکزی در تاشکند برگزار شده است.
اشتراک‌کنندگان این نشست، که به میزبانی بختیار سعیدوف، وزیر امور خارجه‌ی ازبیکستان برگزار شده، رُزا اتنبانوا، نماینده ویژه دبیرکل و رئیس دفتر ملل متحد برای افغانستان، کاها ایمنادزه، رئیس ماموریت منطقه‌ای دیپلماسی پیش‌گیرانه ملل متحد برای آسیای مرکزی، و معاونین وزارت‌های امور خارجه قزاقستان، قرغیزستان، تاجیکستان و ترکمنستان بوده‌اند.
وزارت خارجه‌ی اوزبیکستان در اعلامیه‌ای که به‌مناسبت برگزاری این نشست نشر کرده می‌گوید که آسیای مرکزی همچنان «اولویت» سیاست خارجی اوزبیکستان است.
در بیانیه همچنان آمده‌است که کشورها و اطراف حاضر در این نشست روی «مشارکت» در خصوص افغانستان گفت‌وگو و رأی‌زنی کرده‌اند.
این نشست درحالی برگزار می‌شود که در سه‌سال پسین، برخی‌از کشورهای آسیای مرکزی روابط و هم‌کاری‌های خود را با این رژیم پیوسته افزایش داده‌اند.
