همزمان با اخراج مهاجران افغانستان از ایران و پاکستان، سازمان بین‌المللی مهاجرت اعلام کرد که در 25 روز گذشته (26 سرطان تا 19 اسد)، یک هزار و 647 تن با گذر از شیرخان بندر در قندز، از تاجیکستان وارد افغانستان شده‌اند.
این افراد کسانی هستند که برای مواردی چون دیدار با خانواده، بازرگانی و کار وارد افغانستان شده‌اند؛ در حالی‌که شمار افرادی که – به صورت اجباری و یا داوطلبانه – به کشور کوچ کرده‌اند، تنها به 976 تن می‌رسد.
بخش عمده‌ی این 976 تن، به صورت اجباری بازگردانده شده‌اند.
در 25 روز گذشته، 687 تن، وارد تاجیکستان شده‌اند که نشان می‌دهد با وجود اقدام دوشنبه برای اخراج مهاجران و برنامه‌ریزی برای افزایش شمار اخراج‌ها، همچنان افراد به دلالیلی چون «کار» و «استفاده از تاجیکستان به‌عنوان مسیر ترانزیتی برای سفر به کشور سوم» وارد این کشور می‌شوند.
هم اکنون سه کشور، ایران، پاکستان و تاجیکستان، در حال اجرای روند اخراج مهاجران افغانستان هستند. به گزارش سازمان بین‌المللی مهاجرت، در کمتر از 2 سال گذشته، بیش از 4 میلیون تن وارد افغانستان شده‌اند.
پیشتر، تاجیکستان اعلام کرده بود که به دلیل تخلفات شماری از مهاجران در این کشور، برنامه‌ی اخراج مهاجران را روی دست دارد.
کمیساریای عالی حقوق بشر سازمان ملل متحد در ۲۷ سرطان اعلام کرد که در ده ماه گذشته (اکتوبر ۲۰۲۴ تا جولای ۲۰۲۵)، دولت تاجیکستان دست‌کم ۴۸۵ مهاجر افغانستان را اخراج کرده است.
در اعلامیه آمده که مقام‌های تاجیکستانی در شهر وحدت، شماری از مهاجران و پناه‌جویان افغانستان را در ۱۷ سرطان احضار کردند و به آن‌ها گفتند که باید ضرف ۱۵ روز، این کشور را ترک کنند.
اکنون به نظر می‌رسد روند اخراج مهاجران از تاجیکستان نیز شدت گرفته است.
افغانستان اما ظرفیت‌های لازم برای رسیدگی به امور این بازگشتی‌ها را ندارد.
