نجیب‌الله حقانی، وزیر مخابرات و تکنالوژی معلوماتی طالبان، امروز (دوشنبه)، عازم تاشکند، پایتخت ازبیکستان شد.
بر بنیاد خبرنامه‌ای که از سوی عنایت‌الله الکوزی، سخنگوی این وزارت‌خانه، منتشر شده، حقانی به‌منظور شرکت در سی‌ویکمین نشست کشورهای منطقه‌ای مشترک‌المنافع در حوزه‌ی ارتباطات، به این کشور سفر کرد.
وزیر طالبان پیش از سفرش، در دیدار با اویبک عثمانوف، سفیر ازبیکستان در کابل، پیرامون موضوعاتی چون فناوری، گفت‌وگو کردند.
این سفر در حالی صورت می‌گیرد که روز شنبه، عبدالحکیم شرعی، وزیر عدلیه‌ی طالبان و اندکی پیشتر، عبدالغنی برادر، معاون اقتصادی ریاست‌الوزرای این گروه، به روسیه سفر کرده بودند.
گفتنی است که نجیب‌الله حقانی در نشست کشورهای منطقه‌ای مشترک‌المنافع در حوزه‌ی ارتباطات، در مورد ماهواره، پست و دیگر حوزه‌های مرتبط با فناوری، سخنرانی خواهد کرد.
